Renungan, 16 Januari 2023, Jeremia 9:22-23

Dame ni Debata na sumurung sian saluhut roha, ima na mangaramoti angka ateate dohot pingkiranmuna di bagasan Kristus Jesus Tuhanta i. amen.

Jamita: Jeremia 9:22-23:

Songon on do hata ni Jahowa: sai unang ma ditengahon na bisuk habisuhonna, sai unang ma ditengahon na gogo hagogoonna, sai unang ma ditengahon na mora hamoraonna; Manang ise na naeng mamuji dirina, on ma dipujihon: na marrohai ibana, jala na tinandana I ahu, ai Ahu do Jahowa, parasi roha na manghajongjonghon uhum dohot hatigorandi tanoon, ai angka ido lomo ni rohangku, ninna Jahowa.

Bahasa Indonesia: ayat 23+24: Beginilah firman Tuhan: janganlah orang bijaksana bermegah karena kebijaksanaannya, janganlah orang kuat bermegah karena kekuatannya, janganlah orang kaya bermegah karena kekayaannya; Tetapi siapa yang mau bermegah, baiklah bermegah karena yang berikut: bahwa ia memahami dan mengenal Aku, bahwa Akulah Tuhan yang menunjukkan kasih setia, keadilan dan kebenaran di bumi; sungguh semuanya itu kusukai, demikianlah firman Tuhan.

Mansai las do roha molo adong di hita habisuhon: malo, pistar, IP diatas 3,5, jala ido alana sai dipapujipuji angka natoras angka ianakhon na juara di sikkola, berprestasi, jala gabe sarjana. Las do roha molo adong hagogoon: pamatang na hipas, na timbo, jala gogo, bagakma antong idaon. Ido alana angka natoras sai disosoi jala dijujui do asa masuk gabe polisi, tantara, perwira. Las do roha molo gabe mamora, ido alana sai didok natoras asa unang boros, asa adong mas mu, asa adong jabum, dohot angka na asing. Sai diparsinta jolma do asa adong sude on di ibana. Molo halak Batak mandok asa adong ma nian hamoraon, hagabeon dohot hasangapon.

Alai sipata boi do angka sinadongan on: habisuhon, hagogoon, dohot hamoraon manghorhon ginjang ni roha. Onma bangko ni hita jolma, molo adong di ibana sai naeng ma patuduhononna tu halak, sai dihilala ibana do sumurung ibana godang sian angka donganna. Jala jotjot ma dipangke angka sisongon gabe sinjata laho mandabuhon angka donganna. Gabe diboan tu ginjang ni roha… jala patutoru halak na asing. On do lungun ni roha ni si Jeremia mangida bangso Israel.

Di Jeremia bindu 8-9 taida do lungun ni roha ni si Jeremia marnida bangso Israel na so olo mangungkap rohana tu hamubaon. Mansai ginjang do roha ni bangso Israel, sai ditengahon dirina marhite habisuhon, hagogoon, dohot hamoraon. Lungun ni rohana na umbalga sian si Jeremia ima, ai parjambar nama bangso i diuhuman na ingkon sipasahaton ni Debata. Ndang tarsolsolanna be, ai ro ma tingki paruhuman i. nunga marulanoni si Jeremia pasahathon hata ni Debata asa muba roha ni bangso Israel alai ndang olo nasida muba.

Ninna ibana: 9:1: aut ni gabe aek nian ulungku, jala matangku gabe mual pariluiluan, asa hutangisi nian arian dohot borngin angka na rage sian boru ni bangsongku. Ala ni lungun ni rohana, pola do ingkon suruonna asa dijou angka pangandung laho mangurupi ibana mangandung: Tangihon jala jou hamu angka sibaso pangandung, asa ro nasida, jala suru hamu mangalapi angka boruboru pangarunding (9:17), ai dumarede do iluilu ni matana borngin dohot arian, ndang marpansadian (14:17). Di halak Batak pe molo adong hamatean, olo do sai dijou pangandung laho mangurupi keluarga i, mangandunghon, pasahathon na di rohana. Jadi adong do habisuhon na nidokna mangandung. Parlungun do panurirang Jeremia, ido alana pola adong bukkuna na margoar Buku Andungandung manang Kitab Ratapan.

Ala jonok nama uhuman ni Debata, jadi dipasingot si Jeremia do bangso Israel asa muba rohanasida, sian ginjang ni roha tu haserepon, marunduk ni roha di adopan ni Debata, ai jonok nama ari paruhuman dohot hasusaan i. Didok si Jeremia asa unang ditengahon na bisuk habisuhonna, ai molo adong pe habisuhon na dijalo sasahalak ndang manontong i, jala ndang adong sada halak marnampunahon saluhut habisuhon na adong di portibi on, alai marbagi do hita jolma marnampunahon i.

Asa unang ma ditengahon na gogo hagogoonna! Molo masa pe porang ndada manontong dihamonanghon na gogo, molo marsiadu pe jolma ndada manontong na gogo siparmonang, songon di Daud dohot Goliat. Ai molo manghuling Debata, dipasahat sangkap-Na ndang adong hita na tau mangalo hagogoon i. Masa ma sorimago, marragean ma jolma, ndang adong na tuk mangalo. Holan haunduhon do na boi paluahon hita, marsiajar ma hita sian i. holan haunduhon tu Debata do na tuk paluahon hita jolma. Ido hagogoon ni hita angka na porsea di Ibana. Onma na nidokna: biar mida Jahowa!

Asa unang ditengahon na mora hamoraonna. Godang do halak na sai patuduhon hamoraonna, ninna asa unang pis mata ni halak mornida ibana, asa diparsangapi halak. Ai boi do suda hamoraon, dibuat angka panangko, diotootoi halak, dipasuasaehon angka donganna. Taingot ma hahipasonta ido hamoraonta, roha na mandok mauliate dohot na olo marbagi, ido tanda hamoraon, hamoraon ni tondi ni angka porsea na mananda Tuhan Debata.

Molo tamba habisuhon tamba ma tanggungjawab laho mangajari angka na di humaliang asa tamba angka dongan na bisuk. Ijuk diparapra, hotang diparlabean, na bisuk nampuna hata, naoto diajarajari asa unang tu panggadisan. Tutu do sai dieahi marsingkola, ndada holan asa adong gelar, ndada holan asa tren, manang modal laho mangalului rongkap, alai asa gabe ulaula ni Debata laho mamboan torop halak tu habisuhon. Di ginjang ni saluhut taeahi ma habisuhon na sian Tuhan I, marhite roha na biar mida Jahowa. Poda 1:7: biar mida Jahowa do parmulaan ni parbinotoan.

Molo tamba hagogoonta, manang adong hagogoonta, laho mangajari hita do on asa gabe pelindung, mangurupi na gale, pajongjonghon hatigoran, asa gabe angka parangan na sai marroha holong. Ai Debata do na gogo, holan sanghababa hata do di dok ‘jadi’ ingkon do manjadi. Asa tapangke ma hagogoonta I mardongan biar mida Jahowa, mangoloi hata-Na, mangihuthon bogas-Na. Ai I do dihalomohon Tuhan Debata.

Molo adong pe artanta, martambatamba artanta, diigil do sian hita asa adong roha laho mangurupi angka na pogos, na gale. Adong do sahalak na mora mandok, ahu sai hutangianghon do asa mamora angka tondonghu. Ala molo rappak mamora antong, taboma hilalaon, ala adong dongan manuhuk angka boban na borat di sadasada ulaon. Hamoraon i na sian Debata do I, molo dilehon pe tu hita tasunghun ma Debata, aha do sangkap-Na di bagasan hita. Ai ndang adong taboan sian bortian ni dainang, jala ndang adong boanonta tu bortian ni tano on.

Alani I, unang ma ginjang rohanta, unang ditengahon angka na adong di ibana, alai manang ise na naeng mamuji dirina, on ma dipujihon: Jahowa, parasi roha na manghajongjonghon uhum dohot hatigorandi tanoon Ibana do mual ni nasa na adong di portibi on. Dipapatar do diri-Na marhite angka na tinompa-Na. Nuaeng pe dipapatar do diri-Na tu hita marhite na nilehon-Na angka habisuhon, hagogoon, hamoraon. Dibahen I, tapapatar ma Debata marhite silehonlehon-Na i. Tapasangap ma Debata marhite habisuhonta manang hamaloonta: denggan ma dipangke parbinotoan i, habisuhon I, mahoraon I, laho manghatindanghon Tuhan Debata na mangula di bagasan hita, jala marsangap ma Debata marhite nasa pambahenanta. Patimbo jala pasangap ma Debata di saluhut panggulmiton ni ngolum: marhite:

1. Patuduhon holong dohot asi ni roha
2. Pajongjonghon hatigoran dohot hasintongan
3. Pangoloi di hata dohot lomo ni roha ni Debata.

Asa unang hona uhum hita songon bangso Israel, na madabu tu uhuman ala ditengahon habisuhonna, hagogoonna, dohot hamoraonna. Muba ma hita! Jalo ma sondang hatiuron na sian Debata laho manondangi roha dohot pingkiranta. Sai martambatamba ma habisuhon, hagogoon, dohot hamoraonta, marhite asi ni roha-Na, jala tapangke ma saluhutna i gabe pasupasu tu humaliang, di bagasan biar muda Jahowa. Amen.

oleh: Pdt. Dr. Benny Sinaga