Renungan Pagi, Senin, 29 September 2025

(2 Timoteus 1 : 12)
Ala ni i do umbahen na marsitaonon ahu, alai ndang maila ahu disi; ai hutanda do Ibana na huhaporseai, jala pos do rohangku margogo Ibana mangaramoti na pinalumehonNa i tu ahu, ro di ari sogot i.

Sian hurungan di Rom apostel Paulus manongos surat on tu anakhonna di bagasan haporseaon i ma tu si Timoteus. Didok do surat on surat parmahanion sian sahalak natoras manang bapa secara partondion tu anakhonna asa hot di ulaonna marbarita na uli. Dipaboa apostel Paulus do na marsitaonon ibana ndang ala ni ulaonna na sala alai ala manjamitahon taringot tu Kristus, jala didok ibana ndang maila ibana disi ai ditanda ibana do Jesus na jinamitahonna, panandaon na tangkas marhite haporseaonna tu Jesus i dung pajumpang ibana dohot Jesus di pardalanan tu huta Damaskus. Barani do apostel Paulus bayar harga dung ditanda jala dihaporseai ibana Jesus i sahat tu na tarhurung. Pos do roha ni apostel Paulus margogo do Tuhan I mangaramoti na pinalumehonNa i angka tondi ni angka na porsea i ro di ari sogot i. Dipodai apostel Paulus do si Timoteus na otik dope di umur asa unang hu roha ni halak mida ibana ala haposoonna i, asa tiruan ni angka na porsea ibana di panghataion, di parange, di holong ni roha, di haporseaon nang di hatomanon ( 1 Tim 4 : 12 ). Asa unang maila ibana ala ni pangalahona na hurang alai unang maila ibana ala ni Barita Na Uli I. Manang sitaonon dia pe na tahilala ala ni Kristus I ala ni Barita Na Uli sai unang ma maila hita gabe siihuthon ibana, lam tatanda jala tahaporseai ma Jesus naung hehe i jala naung manghamonangkon sitaononNa humophop hita, jala pos rohanta margogo Ibana mangaramoti hita dohot saluhut angka na porsea di Ibana ro di ari sogot i. Sai burju ma hita ro di ujungna jala dapotan tumpal hangoluan ma hita sian Ibana. Selamat ujian tengah semester mulai ari sadarion, Tuhan mamparbisuhi patupahonsa. Amen

Oleh Ibu Asrama STB HKBP

Bvr. Ronauli Sitompul