Renungan Pagi (Senin, 30 Maret 2026)

Sakaria 1 : 3

Alai dok ma tu nasida: Songon on do hata ni Jahowa Zebaot: sai mulak ma hamu tu Ahu, ninna Jahowa Zebaot, asa mulak Ahu tu hamu, ninna Jahowa Zebaot.

Debata marhite panurirang Sakaria paingothon bangso Israel naung mulak sian habuangan Babel asa unang maniru pangalaho ni ompunasida na mangalaosi hata dohot patik ni Debata. Ala so parduli ompunasida umbahen tarbuang nasida. Panurirang Sakaria manosoi bangso i paulihon bagas joro ni Debata jala paulihon rohanasida parbagasan.

Joujou mandok mulak tu Debata paboahon asa mananda dosa manang hahurangan, mananda diri, pertobatan sejati, mulak mangoloi Debata sian nasa roha dohot gogo, tarida marhite hata nang pambahenan mangoloi patik dohot hata ni Debata. Molo ro nasida tu Debata, ro ma Debata tu nasida mangurupi jala margogoihon, mangapuli dohot pamalumhon. Songon sada anak na mananda diri na manolsoli dosana, ro mangokuhon hasalaanna jala marsinggang tu jolp ni amana, ro do amana marlojong mandapothon jala manjangkon anakna i jala dipatupa pesta las ni roha. Songon i ma Debata marlasniroha molo ro hita angka pardosa tu Ibana, mananda diri dohot dosanta, mulak manadingkon dalanta na roa i, ro mandapothon habangsa parasianNa ai dijangkon Ibana do hita jala dipasupasu.

Sai olo ma hita ro ganup ari mandapothon Ibana, mangokuhon dosanta jala marsihohot porsea jala marpanghorimon tu Ibana ai dihaholongi do hita. Amen

“Bvr. Ronauli Sitompul”