Rungan Pagi (Senin, 12 Oktober 2026)

1 Timoteus 6 : 10 
Ai urat ni nasa hajahaton do roha na holongan di hepeng, i do disangkapi na deba, umbahen na lilu sian haporseaon i, gabe diaithon do godang na bernit tu dirina.

Apostel Paulus manongos surat parmahanion tu si Timoteus na gabe uluan di huria Epesus, asa margogo si Timoteus manguluhon huria i dibagasan roha na togu jala mangajarhon poda na sian Kristus. Asa unang dioloi huria i poda na lipe jala asa hot rohanasida di haporseaon tu Kristus. Disosoi Apostel Paulus do si Timoteus nang huria i asa manghasabamhon na adong. Ai ndang adong taboan tu hasiangan on, jala ndang tarboan hita agia aha laho ruar, molo adong di hita sipanganon dohot parabiton tahasabamhon ma i, i do na nipaingot ni Apostel Paulus tu si Timoteus dohot huria i. Dipodai Apostel i dope asa unang si Timoteus nang huria i holongan di hepeng ai urat ni nasa hajahaton do i, jala mambahen lilu sian haporseaon i, jala diaithon do godang na bernit tu dirina. Na holongan di hepeng i ma na mardebatahon hepeng, tumimbo di ibana hepeng sian Tuhanna. Jala olo dibaen sude cara asalma hepeng. Ingkon humolong do rohanta tu Debata silehon hepeng i sian tu hepeng na adong di hita. Tapangke ma hepeng, arta na dilehon Tuhan I laho pasangaphon Ibana marhite na mangurupi dohot pahembangkon harajaonNa. Amen

Oleh “Bvr. Ronauli Sitompul”